УИХ-ын гишүүн Д.Ганбат 10 гаруй жилийн өмнө Баянхонгорт 40 литрийн бидон тараагаад “Бидон” хочтой болсон. Угаасаа марзан Ганбат гишүүн  “Би хэдэн жилийн өмнө бидон, шанага тараасны ачаар манай Баянхонгор хорт хавдар хамгийн бага байна” гэж омогшлоо. Энэ бидон Ганбат ч яах вэ, цаана чинь УИХ-д Шанага хочны болзол хангачихсан нэг гишүүн бий. Тэр бол Эрдэнэт үйлдвэрийн захирал асан Ч.Ганзоригийн хүү, Ханбүргэдэй компаний захирлын хүргэн Г.Тэмүүлэн.

Албан тушаалд одтой аавтай, оффшорт 5-6 данстай авга ахтай. Хачирхалтай нь авга ахынх нь оффшор данс аавыг нь ГОК-ийн захирлаар ид ажиллаж байх үед оффшор бүсэд нээсэн юм билээ.

Ийм сайхан баян  буянтай айлд төрснийх, АНУ-д боловсрол эзэмшсэн. Монголдоо ирээд, Ашигт малтмал газрын тосны газар, “Эрдэнэс МГЛ” ХХК-д дэд захирал, “Оюутолгой”-н ТУЗ, Уул уурхайн яамны дэд сайд, УИХ-ын гишүүн гээд албан тушаалд бас л азтай одтой. Архангай аймгаас УИХ-д сонгогдсон Г.Тэмүүлэн  чуулганы завсарлагаар тойргоороо явахдаа хөнгөн цагаан шанага бэлэглэжээ. Бас болоогүй ээ, яг голд нь Архангай гээд 1-ийн тоо сийлжээ.