Нүүрсний сонсгол, нүүрсний хулгайн хэргээс дутахгүй “сонирхолтой” хэрэг нь тав хүртэлх жилийн ялтай гэгдэж буй УИХ-ын дарга асан З.Энхболд, УИХ-ын гишүүн, ЗТХ-ийн сайд асан Б.Энх-Амгалан нарын хэрэг юм. УИХ-ын экс даргыг Говьсүмбэр аймаг дахь өөрийн хамаарал бүхий этгээдийн “Страто” компанийн үйлдвэр лүү төсвийн хөрөнгөөр автозам тавьсан хэргээр эрүүгийн хэрэг үүсгэж мөрдөн шалгах ажиллагаа явуулан шүүхэд шилжүүлсэн. Тэгвэл Б.Энх-Амгалан нь ЗТХ-ийн сайд байхдаа Цогтцэций-Чойр чиглэлийн 407 км улсын чанартай автозамыг түр хугацаагаар эзэмших эрхийг бусдад өгч давуу байдал бий болгосон хэрэгт яллагдагчаар татагдаад байна. З.Энхболдын талынхан хэргийг “сүртэй” биш гэж үзэж байгаа гэнэ. Учир нь төсвийн хөрөнгөөр хувийн зуслан, амины орон сууц руугаа зам тавьсан дарга нар зөндөө байдаг гээд тоохгүй байна.
