АН-ын Намын байгуулалтын газрын дарга О.Мөнхбаяр Дарханы АН-ын даргын үүрэг гүйцэтгэгч эмэгтэйг “шилбэдсэн” ХЭРГЭЭС ...

Энэ хэрэг өнгөрсөн оны 8-р сарын 14-нд гарсан. Тухайн үед АН-ын дарга Л.Гантөмөрийн тушаалаар Намын байгуулалтын газрын дарга О.Мөнхбаяр тэргүүтэй ажлын хэсгийн таван гишүүн Дархан-Уул аймгийн АН-ын даргын шинэ үүрэг гүйцэтгэгчийн ажлыг хүлээлцүүлж намын байрны түлхүүр, тамгыг авахаар иржээ. Угтаа тушаалыг гурав хоногийн өмнө тэр үеийн үүрэг гүйцэтгэгч Ц.Энхжаргалд танилцуулсан гэнэ. Ингээд очиход үүрэг гүйцэтгэгч нь 14-15 эмээ өвөөг нам байрныаа үүдэнд суулган хүлээж байжээ. Тэд өндөг гурилаар “зэвсэглэсэн” байсан гэнэ. Эхлээд намын даргын тушаалыг өндөр дуугаар уншиж өгөхөд үүрэг гүйцэтгэгч “Би хэнээс ч ажил хүлээлцэх тушаал авахгүй. Зөвхөн Гантөмөрөөс л авна. Дүрмээрээ явна, Дүрмийн хороогоор шийдүүлнэ” гэжээ. Үүрэг гүйцэтгэгчийн талынхан ч даган эсэргүүцэж “хуурамч тушаал уншлаа” гэж орилолдсон. Тушаал уншиж байхад үүрэг гүйцэтгэгч булааж авах гээд чадаагүйд нөхөр нь тушаалыг булааж аваад урж хаяжээ. Энэ үед эмээ өвөө нар хотоос ирэгсэд рүү өндөг чулуудаж, гурил цацжээ. Хувцаснаас нь зуурч “хот руугаа буцацгаа, бөөгөөр хараалгана, ална” гэж дайрсан гэнэ. Шинэ үүрэг гүйцэтгэгчийн толгой өндгөнд оногджээ. Хотоос ирэгсэд гараа, зарим нь хоолойгоо маажуулжээ. Ийнхүү тэд намын байр луу орох гэж харин үүрэг гүйцэтгэгчийн талынхан хаалгаа онгойлгохгүй хэмээн 2-3 цаг “үзэлцсэн” байна. Дуудлагаар ирсэн цагдаа ч зохицуулж чадаагүй аж. Энэ “тулаан”-ы үеэр Намын байгуулалтын албаны дарга ажлаа өгөхгүй гэсэн үүрэг гүйцэтгэгч Ц.Энхжаргалыг шилбэдсэн гэх хэрэг дэгджээ.

“...Ингээд дахиад бужигнаад маргалдахад тэр гутлынхаа өсгийгөөр даргыг өшиглөсөн. Би хажууд байсан болохоор харсан. Дарга хөл руу өшиглөчихлөө гээд орилсон тэгээд хөлийнхөө зүүн талын шилбэний урд хэсгийг үзэхэд улаан хүрэн болж хавдсан байсан. Харин тэр “би өшиглөөгүй” гээд Олон улсын худалдааны төвийг чиглэж явсан. Тэр л ганцаараа хатуу ултай хар өнгийн ботинктой, бусад нь резинен ултай гуталтай байсан ...”

Харин Намын байгуулалтын дарга шилбэдээгүй гэжээ.

“...Хааны алба халаатай, эзний алба ээлжтэй гэдэг үг байдаг. Хохирогч гэх хүнийг үнэхээр муухай зэрлэг, балмад, дээрэлхүү, ухамсаргүй үйлдэл гаргаж байгааг бичлэгээс хангалттай харлаа. Төв намын даргын тушаалыг танилцуулах үед олон хүн цуглуулж, өндөг шидэж, гурил цацаад хэл амаар доромжилж байгаа үйлдлийг нь үнэхээр ойлгоогүй. Мөн эрх олгосон албаны баримт бичгийг булааж аваад устгасан гэмт хэргийн шинжтэй үйлдэл илэрхий тогтоогдсон байхад мөрдөн шалгах ажиллагаа явуулаагүй ...”

Үүрэг гүйцэтгэгчийн талынхан бичлэг хийж байсан тул тэрийгээ найман СД-д хувилаад нотлох баримт болгож шүүхэд өгчээ. Яг шилбэдэж байгаа таван секундын бичлэг бий гэнэ. Анхан шатны шүүх Намын байгуулалтын даргыг 450 мянган төгрөгөөр торгож хохирогчид 4,5 сая төгрөгийн нөхөн төлбөр олгуулахаар шийдсэн бол саяхан болсон давж заалдах шатны шүүхээс уг шийдвэрийг хүчингүй болгожээ. Харин Ц.Энхжаргалын талынхан одоо болтол торуулиа, хохирлоо төлөөгүй этгээдэд дэндүү зөөлөн ял оноосон гэсэн байна. Тэрээр өмнө нь Дарханы АН-ын Хэрэг эрхлэх газрын даргаар, мөн аймгийн Үйлдвэр хөдөө аж ахуйн газрын даргаар ажиллаж байжээ.

Сэтгэгдэл

Анхаар! Уншигчдын бичсэн сэтгэгдэлд http://alim.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.