“... Миний хүү  2011 оноос хойш л архи уусан. Хүүгээ архинаас гаргах гэж лам, бөөгөөр зөндөө явсан. Аргалуулах гэж их ч юм хийлгэсэн. Танай хүүхэд бузартсан байна, айлын бурхны архи уусан байна гэдэг. Би хүүхдээ засрах байх гэсэндээ аль байдгаараа л тусалж, дэмжиж, мөнгө төгрөг байгаагаа л өгдөг байсан. Талийгаач нь архи уусан үедээ дандаа мөнгө нэхдэг. Тэгэхгүй бол ийш тийшээ явлаа, өвлийн хүйтэнд нүцгэн гараад хөлдөөд үхчихье гээд сүрдүүлдэг. Зарим үед нь би өөрөө хүртэл гараад архи авч өгдөг байсан. Өгөхгүй гэх юм бол “битгий миний уурыг хүргээд байгаарай, алчихна шүү” гээд заналхийлэн айлгадаг байсан. Нэг удаа би хаачих гээд байгаа юм бэ гээд дагаад гарахад түлхээд унагаж байсан. 2022 оны 11-рдүгээр сард гаднаас архи уусан орж ирээд хаалга тайлж өгсөнгүй гээд миний мөр лүү цохиод мөр эвгүй болсон. Мөн дүүгийнхээ том охиныг янз бүрээр үг хэл болон үйлдлээрээ оролдоод байдаг байсан. “Чи ямар хөөрхөн юм бэ” гээд урдуур хойгуур нь явахаар хормой хотыг нь сөхдөг. Тэгээд “ах нь мөнгөтэй ирсэн, гарч зайрмаг авч идэх үү, гоё юм авч өгье, хамт гарах уу” гэдэг. Энэ мэт үйлдлийг олон гаргаж байсан. Хүүгээ ирэхээр би хоёр ачийгаа араараа унтуулдаг. Согтуу орж ирээд надаас мөнгө нэхдэг. Мөнгөө харамлалаа гээд жижиг эвхэгддэг хутга гаргаж ирээд миний хоолой руу тулгаад гал тогооны өрөөний тек хүртэл түлхээд дарж байсан. Мөнгө өгөхөөр авч гараад л согтуу орж ирдэгөгдөг. Би согтуу ирэхээр нь яачих бол гээд айгаад хар дараад унтаж чаддаггүй. Сүүлдээ өөрөө тайван байхын тулд Христэд хүртэл итгэх болсон. ... Тэр орой би хоёр ачтайгаа унтах гэж байтал 23 цагийн орж ирээд хоол идье гэхээр нь өдрийн хийсэн бантангаа өгөхөд “ нохойны хоол” гээд араас өшиглөсөн. Би өрөөндөө ороод хэвтэх гэтэл бархираад байхаар нь очсон. Энэ үед сарны гэрэлд цагаан юмаа барьчихсан “би өөрийгөө ална, эсвэл би таныг ална” гээд босоод ирсэн. Тэр үед би “ингээд үхдэг юм байна, хоёр хүүхдийг минь яачих юм билээ” гэж бодоод түлхсэн. Согтуу байсан учраас арагшаа орон дээр унахдаа хутгаа алдаж унагасан. Босож ирээд хутгаа авах гэхэд нь булааж авсан. Тэрнээс хойш бол сайн мэдэхгүй байна. Ямар ч байсан орон дээрээ хэвтэж байсан. Би унтчихлаа, одоо гайгүй боллоо гэж бодоод л гарсан. Тэгээд хоёр хүүхдийнхээ хажуугаар орж хэвтээд “сая юу болчихвоо, сая би яачихваа” гээд бодоход санаанд юу ч орж ирэхгүй байсан. Босоод өрөө рүү нь ороод гэрлээ асаах үед орон дээр дээш харсан байдалтай, цус гоожсон, хутга нь газар байсан. Би хутгыг нь авсан. Хутгыг барьчихлаа гэж бодоод хөнжлийн нэг хэсгээр 2-3 удаа шувтраад арчсан. Сүүлд прокуророос хэдэн удаа хутгалсан гэдгээ сонсоод үнэхээр их гайхаж, өөрийгөө тийм зүйл хийсэн гэдэгт итгээгүй. Өөрийнхөө хүүхдийг ийм байдалд хүргэнэ гэж үнэхээр бодоогүй, төсөөлөөгүй. Харамсаж гэмшээд барахгүй байна. Одоо ч гэсэн өөртөө итгэхгүй байна ...”