“... Я.О нь миний төрсөн хүүхэд бөгөөд архи уугаад 20 гаруй жил болж байна. Гаднаас орж ирээд надаас архины мөнгө нэхээд “байхгүй” гэхээр “өг” гэж сүрдүүлэн нуруу руу нэг удаа өшиглөсөн. Гарч зугтаахад араас хашаан дотор байсан шуудайтай үнс цацаад орилж хашхичаад доромжилсон. Дараа нь гэртээ байхад согтууруулах ундааны зүйл хэрэглэсэн байдалтай орж ирээд надад “гар утсаа өг” гэхээр би “өгөхгүй, архинд тавих гэж байгаа биз дээ” гэсэн чинь уурлаад гэрийн үүдэнд байсан шуудайтай модыг аваад “чи муу өмхий өтгөн утсаа өг” гэж хашхичиж айлган сүрдүүлж байгаад гараад явсан. Орой надаас тамхины мөнгө дахиж нэхээд, мөн “амбаарынхаа түлхүүрийг өг, айлд очиж хоол хийж идэх хэрэгтэй байна” гээд айлган сүрдүүлж дарамталсан. Би айгаад гэрээс гарч урд талын айлд орж цагдаа дуудсан...”

“... Нэг хашааны хөрш болоод 13 жил гаруй болж байна. Миний мэдэхээр Я.О нь байнга л архи согтууруулах ундааны зүйл хэрэглэсэн үедээ эхийгээ цохиж зодож доромжлож гэр бүлийн хүчирхийлэл үйлддэг. Эгч манайх руу гүйж орж ирээд “хүү намайг цохиж зодоод, мөнгө нэхээд, архи нэхээд айлгаад байна цагдаа дуудаад өгөөч” гэдэг. Архи уугаагүй үедээ ч “тамхи олоод ир, архи олоод ир”, хоол хийгээд өгөхөд “би ийм хоол идэхгүй” гэж өөдөөс нь шиддэг. Хүү нь  хөдөө орон нутагт хэд хоногоор явах эсвэл архины эмчилгээ, баривчилгаанд явсан хойгуур эгч сэтгэл нь их амарсан бололтой инээсэн, мишээсэн байдалтай байдаг. Хүүхэд нь буцаад ирэхээр л байж сууж газраа олдоггүй. Манайд зугтаад орж ирэхэд хүү нь араас орж ирээд элдэв янзаар дуудаж, доромжилж миний санаж байгаагаар хоёр удаа цохиж байсан. Эгч айгаад манай ширээн доогуур орсон байхад хүү нь гар хөлөөс нь татаж гаргах гэхэд нь би олон удаа хөөж гаргаж байсан ...”

“... Я.Отгон... нь Зээлийн ... тоотод ээжтэйгээ цуг гэрт амьдардаг. Олон удаагийн цагдаагийн дуудлагатай. Нийт 18 удаа дуудлага ирсэн бөгөөд архи ууж согтуурсан үедээ агсам тавьдаг. Гарт тааралдсан бүхнийг авч шиддэг, хагалдаг зуршилтай Ээж нь байнгийн айдас түгшүүртэй амьдардаг. Я.О нь ээжийнхээ тэтгэврийн мөнгөөр амьдардаг. Ээжийгээ дарамталж архины мөнгө нэхдэг. Ээж нь тэтгэвэрээ өгөхгүй гэдэг ч айгаад өгчихсөн байдаг ...”

“...Надад гомдол, санал, нэхэмжлэх зүйл байхгүй. Хүүхэддээ гомдоод яах ч билээ. Би сэтгэцэд учирсан хохирлоо тогтоолгохоор шинжээч томилуулахгүй...”