Говь-Сүмбэр аймагт төрсөн, 21 настай эмэгтэй И.Б-А нь согтууруулах ундааны зүйл хэрэглэсэн үедээ Налайх дүүргийн 8-р хорооны нутаг дэвсгэрт байрлах Эрүүл мэндийн төвийн төрөх тасгийн асрагч Б.М-ыг “төрөх болоогүй байхад эмнэлгээс гаргахгүй байна” гэх шалтгаанаар түлхэж унагаан, биед нь бүсэлхийн нугалмын хөндлөн сэртэнгийн хугарал, нуруунд цус хуралт, зөөлөн эдийн няцрал гэмтэл бүхий эрүүл мэндэд нь хүндэвтэр хохирол санаатай учруулсан гэмт хэрэгт холбогджээ.
Хохирогч ийн мэдүүлжээ.
“...Тухайн өдөр И.Б-А эмнэлэгт төрөх гээд ус нь гарсан байдалтай согтуу орж ирсэн. Тэгээд үзлэгийн өрөөнд оруулж ургийн бичлэг хийлгээд, хордлого тайлах дусал хийхээр болсон. Энэ үеэр нөхөр нь орж ирээд сууж байхад И.Б-А гэр рүүгээ явмаар байна гээд уйлсан. Тэгээд нөхөртэйгөө хэрэлдсэн. Хэрэлдээд байхаар нь эмч намайг дуудаад “гаргаж болохгүй шүү, наад хүний чинь ус нь нэлээн гарчихсан байна, та харж байгаарай” гэж хэлсэн. Би сандал дээр суугаад харж байсан. Тэгээд И.Б-А эмнэлгээс гарах гээд байхаар нь “гарч болохгүй миний дүү” гэсэн чинь нөхөртэйгөө хэрэлдсэн уурандаа намайг түлхээд сандал руу унагаачихсан. Би босож чадахгүй хэвтэж байхад А эгч босгоод жоохон суулгаж байгаад өвчин намдаах тариа хийсэн. Тэгээд би шөнөжин өвдөж хоноод өглөө нь эрт эмнэлгээр явж, рентгенд харуулж үзлэгт орсон...”
Эмч ийн мэдүүлжээ.
“...Үүрэг гүйцэтгэж байхад ус нь гарсан согтуу жирэмсэн эмэгтэй орж ирэхээр нь хүлээж авч үзээд эхо-д хараад эх барихын тусгайлсан үзлэг хийж ургийн бичлэг хийж хэвтүүлсэн. Төрөлтийн түүх нээсний дараа тухайн эмэгтэй гарна гээд нөхөртөө уурласан. Нөхөрт нь эхнэрээ аргад гэж хэлээд хэсэг хугацаанд өрөөнд оруулсан. Удалгүй нөгөө эмэгтэй “би энэ хүүхдийг чинь яасан ч гаргахгүй, чамаас болж би ийм болсон” гээд уурлаад хашхичсан. Би асрагч Б. М-д “наад эмэгтэйгээ гаргаж болохгүй шүү ус нь гарчихсан байгаа” гэж хэлээд өрөө рүүгээ орсон. Удалгүй манай хагалгааны сувилагч А орж ирээд “нөгөө согтуу жирэмсэн эмэгтэй чинь Б.М-ыг түлхээд унагачихлаа” гэсэн. Би өрөөнөөсөө гараад очиход төрөхийн үүдний ордог хэсэгт асрагч Б.М баруун тийшээ хазайсан нэлээн зовуурьтай байсан...”
Шүүх шүүгдэгч нь эмнэлгийн тусламж үйлчилгээ авахаар эмнэлэгт очсон атал эмнэлгийн байгууллагын ажилтны хууль ёсны шаардлагыг биелүүлээгүй, хохирогчийн эрүүл мэндэд хүндэвтэр хохирол учирсан, хохирогчоос нэхэмжилсэн хохирлыг төлөөгүй, гэм буруугаа хүлээн зөвшөөрөөгүй, анх удаа гэмт хэрэг үйлдсэн, хөхүүл хүүхэдтэй зэргийг харгалзан нэг сар зорчих эрхийг хязгаарлах ялаар шийтгэжээ.
Анхаар! Уншигчдын бичсэн сэтгэгдэлд http://alim.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
