Согтуу эр араар тавьсан эхнэрийх нь машины дугаартай адилхан дугаартай машины цонх толийг хагалжээ

38 настай, эхнэр хоёр хүүхдийн хамт амьдрах Б.Б нь архи согтууруулах ундааны зүйл хэрэглэсэн байх үедээ 2024 оны 03 дугаар сарын 26-ны өдөр Баянзүрх дүүргийн 16 дугаар хорооны нутаг дэвсгэрт 9... дугаар байрны гадна байсан иргэн Г эзэмшлийн “... “ УБЦ улсын дугаартай Приус 20 маркийн тээврийн хэрэгслийн баруун толь, баруун урд хаалганы шилний нуух чихэгдэж нугарсан, усны хаялга, хаалганы шил зэргийг хагалж хууль бусаар устгасны улмаас бусдад бага хэмжээнээс дээш хохирол буюу 450,000 төгрөгийн хохирол учруулсан гэмт хэрэгт холбогджээ.

Болсон явдлын талаар хохирогч ийн мэдүүлжээ.

“...Би хувиараа ажил хөдөлмөр эрхэлдэг бөгөөд 2024 оны 03 дугаар сарын 26-ны өдөр 22 цагийн орчим Баянзүрх дүүргийн 16 дугаар хороо 9 ... дугаар байрны гаднах автомашины зогсоолд өөрийн эзэмшлийн “...” УБЦ улсын дугаартай цагаан өнгөтэй Пруис 20 загварын тээврийн хэрэгслийг байрлуулж гэр лүүгээ орсон. Гэтэл хэсэг хугацааны дараа машины цонх хагарсаныг мэдээд машин руугаа очтол дэргэд нь үл таних согтуу хүн байсан. Яагаад машины цонх хагалсан талаар асуухад манай эхнэр намайг хуурсан, гэтэл чиний машины дугаар эхнэрийн машины дугаартай адилхан байхаар нь уур хүрээд машины чинь цонхыг чинь хагалсан гэж хэлсэн тул цагдаагийн байгууллагад дуудлага өгсөн ...”

Шүүгдэгч гэм буруугаа хүлээн зөвшөөрч хэргээ хялбаршуулсан журмаар шийдвэрлүүлэх хүсэлт гаргасан тул шүүх 500 мянган төгрөгөөр торгожээ.

Сэтгэгдэл

Анхаар! Уншигчдын бичсэн сэтгэгдэлд http://alim.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.