
Шинээр хэрэгжиж эхэлсэн Эрүүгийн хуулийн 12,1-д буюу “Хүчиндэх” гэсэн зүйл ангид хохирогч
Энэхүү хэрэг 2023 онд гарсан агаад саяхан оны өмнө шүүх хурал нь болж өдгөө 15 настай хүүд 12 жилийн хорих ял оноожээ. Хүү 14 насны төрсөн өдрийн баяраа гэр бүлийнхээ зуслангийн байшинд тэмдэглэхээр эцэг эхээсээ зөвшөөрөл хүсжээ. Эцэг эх нь архи согтууруулах ундааны зүйл хэрэглэхгүй гэсэн нөхцлөөр зөвшөөрсөн байна. Ингээд хүү найз нараа урьжээ. Мөн тухайн үед 13 нас 11 сартай байсан найз охин нь иржээ. Төрсөн өдрийн баяр дуусаж найз нөхөд нь явсаны дараа хүү найз охинтойгоо харилцан зөвшөөрөлцөж бэлгийн харьцаанд орсон байна. Гэсэн ч хоёр сарын дараа тэд мууцалцсанд найз охин нь эцэг эхдээ төрсөн өдрийн баяраар болсон явдлын тухай хэлээд хүчиндсэн хэмээн цагдаад өргөдөл өгсөнөөр хүү бага насны хүүхэдтэй бэлгийн харьцаанд орсон хэмээх доод тал нь 12 жилийн хорих ялтай хэрэгт татагджээ. Ингээд бөөн хэрэг мандаж хүү шууд яллагдагчаар татагдсан. Хэрэг явдал даамжирсанд экс найз охин нь эмээж шүүх хурал дээр уйлжээ.
Эрүүгийн хуулиар 14 насанд хүрсэн хүнд л бэлгийн эрх чөлөө үүсдэг байна. 14-өөс доош насныханд бэлгийн эрх чөлөө угаасаа байхгүй гэж үздэг. Хэдий хохирогч өөрөө зөвшөөрсөн ч уг насныхантай бэлгийн харьцаанд орох нь шууд хүнд ноцтой хүчингийн гэмт хэрэгт тооцогддог. Ингээд хэрэг гарсан тухайн үед найз охин нь 14 нас хүрээгүй буюу 13 нас 11 сартай байсан, мөн хүү 14 нас хүрсэн буюу эрүүгийн хариуцлага хүлээх насанд хүрсэн тул шүүх яллагдагч хүүг бага насны хүүхэдтэй бэлгийн харьцаанд орсон хэмээн үзэж 12 жилийн хорих ял оноожээ. Энэ төрлийн гэмт хэрэг нь өршөөлд хамрагдахгүй, магадланд орохгүй, шагналын өдөр хасагдахгүй тул хүү 12 жилээ бүрэн дуусгаад 27 настайдаа суллагдах гэнэ. Болсон явдал өсвөр насныханд бэлгийн боловсрол, энэ талаархи хууль эрх зүйн мэдлэг маш дутагдалтай байгааг харуулж байна.