“Архангайн аймгийн нутгийн зөвлөл”-өөс улсын арслан Д.Мөнх-Эрдэнэд өгсөн 10 сая төгрөгийн ТҮҮХЭЭС ...

Мал аж ахуйн эрдэм шинжилгээний хүрээлэнгийн захирал асан Т.Батсүх, Архангайн аймгийн Засаг дарга асан Ц.Мөнхнасан, мөн ИТХ-ын дарга асанБ.Өсөхбаяр нарын холбогдсон 15 гаруй үйлдэлтэй эрх мэдлээ мэтрүүлсэн, өөртөө болон бусдад давуу байдал учруулсан, дээр нь зодооны гэх хэрэг долоо дахь жилдээ сунжирч явна. Асангуудын хэрэгт Архайнгайгаас төрсөн улсын арслан Д.Мөнх-Эрдэнийн алдрыг тэмдэглэн 2018 онд нутгийн зөвлөлөөс нь өгсөн гэх 20 сая төгрөгний ул мөр тод “бичигджээ”. Энэ мөр УИХ-ын гишүүн асан Ж.Мөнхбатаар дайраад өнгөрсөн байна. Мөн Архангайд огт хамаагүй Ерөнхий сайд асан Ж.Эрдэнэбатын дүү Төгсөө бэлэн мөнгө барьж яваад “татагдаад” оржээ. Эхэндээ 20 сая гэж яригдаад дараа нь 10 болсон гэх энэ мөнгөний эх үүсвэр нь “Алтай гоулд” компаниас гарчээ. Энэ компани Архангайн ЗДТГ-тай 100 сая төгрөгийн нийгмийн хариуцлагын гэрээ байгуулсан агаад захирал Ц. Мягмардорж руу нь аймгийн Засаг дарга Ц.Мөнхнасан залган “...аймаг орон нутгаа сурталчлах гээд нэг байгууллагатай гэрээ хийсэн чинь мөнгөө нэхээд байна...” гээд 10 саяыг Монголын Үндэсний сайтуудын нэгдсэн холбоо ТББ руу хийлгэжээ. Дараа нь Засаг даргын туслах залгаад Полоожий гэдэг хүний данс руу 20 сая төгрөг хийлгүүлсэн гэнэ. Ахин залгаад Ашидбаяр гэх хүний данс руу 20, Солонгын данс руу 10 сая гэх мэтээр дандаа хувь хүний данс руу шилжүүлсээр нийгмийн хариуцлагын гэрээний 100 саяа бүрэн авчээ. Дээрхи мөнгөний нэлээд хэсэг “Гурван тамир” компаний захирал Ж.Нэргүйн хэлсэн данс руу шилжигджээ. Энэ мэтчилэн явсаар УИХ-ын гишүүн Ж.Мөнхбатын жолоочийн найзын данс руу орсон байна.

“... Ж.Мөнхбат гишүүний жолооч “дарга мөнгө аваад ир гэж байна, чиний дансаар авчихая” гэхэд нь дансны дугаараа өгөхөд нийт 20 сая төрөг орж ирсэн. Тэгээд жолоочтой нь хамт Хан-Уул дүүргийн Home plaza төвийн урд талын КFС-ийн дотор байх Хаан банкны АТМ-д очсон. Тэгэхэд Жаргалтулгын Төгсөө гэдэг ах бэлэн мөнгө хийх гээд зогсож байсан. Би тан руу мобайлаар шилжүүлчихье, та бэлэн мөнгөө өгчих гээд Төгсөө ахын данс руу 3,0 саяар гурван удаа, 1,0 саяар нэг удаа нийт 10,0 төгрөгийг шилжүүлсэн ...”

Ж.Мөнхбатын жолооч ийн мэдүүлжээ.

“...АТМ дээр найзын танилтай таарсан. Тэр нь Ерөнхий сайд Жаргалтулгын Эрдэнэбатын төрсөн дүү нь байсан. Би Ерөнхий сайдтай ямар адилхан хүн бэ гэж бодож байсанаа тод санаад байна. Ерөнхий сайдын дүү баахан бэлэн мөнгө барьчихсан байхаар нь тэр мөнгөнөөс нь авсан. Мөнгөө аваад гишүүн дээр очиход Монгол Улсын арслан Д.Мөнх-Эрдэнэ байсан . Би гишүүний хажууд мөнгөө арсланд өгсөн ...”

Арслан ч мөнгө авсанаа баталжээ.

“...Мөнхбат гишүүн Их тэнгэрийн аманд байдаг зуслангийн байшиндаа дуудаад 10 сая төгрөг л өгсөн байх, ерөөсөө их мөнгө аваагүй ...Тэр өдрөө мөнгөө машины эзэнд өгсөн ...”

Архангайн нутгийн зөвлөл аймгаасаа төрсөн арсландаа машин бэлэглэсэн агаад машины эзэн ийн мэдүүлжээ.

“...Чиний машины мөнгийг чинь нутгийн зөвлөлийн дарга Ж.Мөнхбат гишүүн зохицуулж өгнө гэж надад хэлж байсан ...”

Ийнхүү арслангийн машины мөнгө аймгийн дансанд орох ёстой нийгмийн хариуцлагын гэрээний мөнгөнөөс “зохицуулагдсан” гэнэ. Мөрдөгчид тухайн үед Архангай аймгийн ЗДТГ-ын санхүүгийн хэлтэст ажиллаж байсан хүмүүсээс гэрчийн мэдүүлэг авчээ.

“... Аймгийн төсвийн орлогын дансанд нийгмийн хариуцлагын гэрээний хүрээнд орж ирсэн мөнгө 2017 оноос хойш байхгүй. Тамгын газрын нягтлан бодогч, санхүүгийн хэлтсийн төсвийн орлого хариуцсан ахлах мэргэжилтэнээс тодруулахад “тийм мөнгө аймгийн төсвийн орлогын данс болон тамгын газрын дансанд орж ирээгүй” гэсэн хариултыг өгсөн ...”

Дараагийн удаад Архангайн засаг дарга асан Ц.Мөнхнасан, Мал аж ахуйн эрдэм шинжилгээний хүрээлэнгийн захирал асан Т.Батсүх нарын зодооны тухай хүргэнэ.

Сэтгэгдэл

Анхаар! Уншигчдын бичсэн сэтгэгдэлд http://alim.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.