УИХ-ын гишүүн  О.Содбилэг эхнэр хүүхдүүдийн хамт гадаадад гацжээ. Эрдэнэтээс сонгогдсон О.Содбилэгийг Завхан аймагт нэр дэвшихээр болсон гэж ярьдаг. Гэвч Эрдэнэт хотоос сонгогдох болжээ. О.Содбилэг гишүүн одоогоор гадаадад хөл хорионд орсон тул амжин ирж, нэр дэвших эрхээ авч чадах эсэх нь эргэлзээтэй байна. Харин О.Содбилэгийг эзгүйд Эрдэнэтэд нэр дэвших хүсэлтэй эрхмүүд тойргоор нь эргэлдэж байна. Бат-Өлзийн Бат-Эрдэнэ гэдэг залуу сүүлийн 3 жил Эрдэнэтэд очиж, олон төсөл хөтөлбөр эхлүүлсэн. Харамсалтай нь Б.Бат-Эрдэнэ “ЖДҮ” гэсэн тамгатай. Түүний хамаарал бүхий компани ЖДХС-гаас зээл авсан нь илэрч, ЗГХЭГ-ын дэд даргын албан тушаалаа өгсөн.  МАН-ын горилогч Б.Бат-Эрдэнийг “ЖДҮ”-тэй холбож, УИХ-д нэр дэвших эрхийг хааж магадгүй. Тэгвэл орон нутгийн сонгуульд оролцож, Орхон аймгийн Засаг дарга болох мөрөөдөлтэй гэлцдэг. Увсаас удаа дараа, 2016 онд Хан-Уул дүүргээс сонгогдсон Ц.Нямдорж Эрдэнэт хотод рейтинг нь ямархуу байгааг тандсан гэх.

 Орхон аймгийн Засаг дарга Д.Батлут эр хүний дотор эмээлтэй хазаартай морь багтана гэгчээр Эрдэнэтээс УИХ-д сонгогдох хүсэлтэй байгаа аж. АН-ын Ерөнхий нарийн бичгийн дарга асан Ц.Бат-Энх, Эмэгтэйчүүдийн холбооны Б.Оюунгэрэл гэхчлэн Эрдэнэт хотоос УИХ-д нэр дэвшихээр санаархаж яваа хүмүүс цөөнгүй.

Харин Ардчилсан намаас саяхан МАХН-аас тус намд шилжиж ирсэн О.Баасанхүү гишүүн дахин нэр дэвших тохироотой ирсэн гэнэ. Орхон аймгийн АН-ын дарга Ц.Батхуяг бас нэр дэвших сонирхол тээж яваа. Мөн "Орхон Чандмань" ХХК -ийн захирал Д.Өсөхбаяр,  “Хангайн бүс ” худалдааны төвтэй, Эрдэнэтийн томоохон захуудын босс Ц.Ойдов орон нутгийн бизнесмэнүүд 2020 онд  УИХ-д нэр дэвшихээр аль эрт 100 сая төгрөгөө тушаажээ.

 МАХН -аас М.Оюунбат гэдэг горилогчийн нэр явж байна. МАХН-аас Монгол улсын Ерөнхийлөгчийн сонгуульд өрсөлдөж байсан “Фенгшү” Ганбаатар Эрдэнэтээр эргэлдэж яваа. Мөн МАХН-ын дарга Н.Энхбаярын халаасны хүн болох ТВ9 телевизийн ТУЗ-ийн дарга  Баттөр гэх эрдэнэтчүүдийн огт танихгүй хүн нэр дэвших тухай яриа гарч байна.