Доорхи нэр бүхий компаниудын төсөл нь салбарын яамнаас бодлогын хувьд дэмжигдэж, Хөгжлийн банк болон холбогдох арилжааны банкны шалгуурыг хангасаны үндсэн дээр санхүүжилт олгох зээлийин хорооны шийдвэр гарч зээл олгогдсон. Гэтэл авсан зээлээ зориуд санаатайгаар зориулалтын дагуу зарцуулаагүй, өөр бусад зээлийг хаасан зэрэг нь онц их хэмжээгээр залилах гэмт хэргийн шинж чанрыг агуулсан байх тул хуулийн байгууллагад шилжүүлэхээр болжээ.

• “Файнаншл алиянс” ХХК Улаанбаатар хотын банкаар дамжуулан малын тэжээлийн үйлдвэр барих төсөлд 18,000.0 сая төгрөгийн зээл авсан боловч зориулалтын дагуу зарцуулаагүй,
• “Драгон холдинг” ХХК Төрийн банкаар дамжуулан “Цэвэр ус савлах, сав баглаа боодлын үйлдвэр байгуулах төсөл"-д 8.4 тэрбум төгрөгийн зээл авсан боловч зориулалтын дагуу зарцуулаагүй;
• “Гранд стони” ХХК элс хайрганы карьерын төсөлд зориулж 2016 онд 1.4 тэрбум төгрөгийн зээл авсан боловч тухайн газрын иргэдийн эсэргүүцэлтэй тулгарсан гэх шалтгаанаар хэрэгжээгүй, зээлийн хөрөнгийг Хаан банкнаас авсан зээлийг төлөхөд зарцуулсан.

• “Чойр хайрхан” ХХК Голомт банкаар дамжуулан 2013 онд 1.3 тэрбум төгрөгийн зээл авсан байна. Зээл олгосны дараа буюу 2013 оны 10 дугаар сарын 10-ны өдөр “Ноос, ноосон бүтээгдэхүүн үйлдвэрлэл” төслийн хэрэгжилтэд хяналт тавих тухай ХХТТ/01 тоот гэрээг ХХААХҮЯ-ны “Ноос, ноосон бүтээгдэхүүн үйлдвэрлэл” төслийн нэгжийн дарга Ц.Мөнхбаатар, “Чойр хайрхан” ХХК-ийн захирал Л.Одсэр нар байгуулсан бөгөөд гэрээнд зээлийн хөрөнгөөр авах техник, тоног төхөөрөмжийн тоо ширхэг, үнийн дүнг тусгаж, зориулалт бусаар зарцуулахыг хориглосон байна. Зээлийн дүн нийт санхүүжилттэй тэнцүү байгаа нь ҮАБЗ-ийн 2012 оны 12 дугаар сарын 03-ны 28/20 дугаар зөвлөмжийн 2.458-т заасныг зөрчсөн бөгөөд 2013 оны 10 дугаар сарын 10-ны өдөр “Ноос ноосон бүтээгдэхүүн үйлдвэрлэл” төслийн хэрэгжилтэд хяналт тавих тухай ХХТТ/01 тоот гэрээнд зааснаар ноос хялгас ялгах иж бүрдлийг 1,100.0 сая төгрөгөөр БНХАУ-аас, эсгий хийх төхөөрөмжийг 200.0 сая төгрөгөөр Польш, БНХАУ-аас 2013 оны 10 дугаар сарын 20-ноос 2014 оны 1 дүгээр сарын 30-ны хооронд авахаар зээлийн нөхцөлд тусгагдсан байна. Гэтэл ГЕГ-ын  лавлагаанд “Чойр хайрхан” ХХК нь тоосго, цонх, төмөр хана, зарим тоног төхөөрөмж зэргийг гаалиар оруулж ирсэн гэж бүртгэгдсэн байгаа нь гэрээнд заасан тоног төхөөрөмжийн нэр төрөл, үнийн дүнгээс зөрүүтэй байна. Мөн Монголбанкны зээлийн мэдээллийн сангийн лавлагаагаар “Чойр хайрхан” ХХК нь Голомт банканд 600 орчим сая төгрөгийн зээлийн үлдэгдэлтэй байсан бөгөөд Хөгжлийн банкны хөнгөлөлттэй зээлээр уг зээлийг хаасан байж болзошгүй байна.