Дэлхийн хамгийн хүчирхэг удирдагч гэгддэг энэ хүнийг ийм аргаа барсан байдалд оруулсан  хүмүүс нь америкчууд биш юм. Харин өөрийх нь оросууд аж. Оросын ерөнхийлөгч энэ сарын 11-нд Засгийн газрын өргөтгөсөн хуралдаан дээр манайхтай ойролцоо оршин Амурск мужид баригдаж байгаа “Восточный” сансрын буудлын төслийн хэрэгжилтийн талаар ярихдаа ийнхүү “Хулгайлаад дууслаа” хэмээн дуу алджээ.

-Ажлын гүйцэтгэлийг нээлттэй, ил тод байлга гэж хэдэн зуун удаа үүрэг чиглэл өгсөн. Шаардагдах хөрөнгийг хангалттай гаргаж өгч ирлээ. Энэ төсөл нь манай үндэстний хэмжээнийх гэж хэлж болно. Гэтэл байдаггүй. Хэдэн зуун саяар нь хулгайлсан байна. Олон арван эрүүгийн хэрэг үүслээ. Түрүүчээсээ шүүх хурлууд нь болоод эхний гэмтнүүд ялаа аваад шорон суусан. Гэсэн ч бас л байдаггүй. Хуулийн хатуу арга хэмжээ авсан ч тэнд дэг журам тогтоогүй л байна-

Оросын Засгийн газар энэхүү сансрын буудлын болон түүнтэй хамт баригдах цэрэг-аж үйлдвэрийн цогцолборын төсөлд 90 орчим тэрбум рубль төсөвлөснөөс одоогоор 66 тэрбумыг зарцуулаад байна. Харин энэ хөрөнгөнөөс 11 тэрбум гаруй нь ийнхүү авлигач түшмэдийн гараар орж хулгайлагджээ. Хуулийнхан 140 эрүүгийн хэрэг үүсгэж, шүүх 32 өндөр албан тушаалд хорих ял оноож нийтдээ 3,5 тэрбум рублийг хурааж авсан. Гол хулгай цогцолборын ханган нийлүүлэлтэнд болон барилгын ажилд  гарч байгаа гэнэ. Хэдийгээр хатуу арга хэмжээ авч хяналтыг чангатгаж байгаа ч хулгай огт буурсангүй. Өнгөрсөн 8-р сард ерөнхийлөгч Путин цогцолборын барилга дээр өөрөө очиж ажилласан ч байдал дээрдээгүй аж. Хамгийн том хулгайг хамгийн өндөр эрх мэдэлтнүүд хийж байгаа гэнэ.  Энэ оны 2-р сард 2006-2016 оны ерөнхий гүйцэтгэгчээр ажилласан барилгын «Дальспецстроя»  группын ерөнхий захирал асан Юрий Хризманд эрх мэдлээ ноцтойгоор хэтрүүлсэн хэмээн хорих ял оноосон. Тэгвэл саяхан Москва хотын шүүх цогцолборын барилгын ажлыг гүцэтгэхдээ 1,3 тэрбум рубль ашиглан шамшигдуулсан гэж мөн л “Волго-Вятский” барилгын компаний үүсгэн байгуулагч болон ерөнхий менежер нарт найман жилийн хорих ял оноогоод байна.