“Сэргээн босголт” банк байгуулагдахдаа 22,6 тэрбум төгрөгийн актив хөрөнгөтэй, 1,8 тэрбум төгрөгийн дүрмийн сантай, 800 гаруй ажиллагсадтай 34 салбар, 50 гаруй тооцооны касстай томоохон банк байв. Гэвч нэг жилийн дотор тус банкинд дөрвөн захирал солигдож, активпассивын захирлыг нь гурав, орлогч захирлыг гурван удаа ойр ойрхон халж, сольжээ. Үүгээр ч зогсохгүй жилийн дотор тус банкинд Сангийн яам, Монголбанкны хамтарсан шалгалт найман удаа орсон байдаг.
Удалгүй тус банкийг татан буулгахаар тухайн үеийн Ерөнхий сайд Ц.Элбэгдоржийн 80 дугаар тогтоол гарав. Ингэснээр удалгүй төрийн өмчийн “Сэргээн босголт” банк 1998 оны 5-р сарын 28-нд Сангийн сайдын 239 тоот тушаалаар хувийн “Голомт” банкинд нэгтгэсэн байдаг. Томоохон банкийг тавхан сая төгрөгөөр үнэлж төрийн өмчийг хувийн өмчид шилжүүлсэн хачирхалтай явдлын учиг өнөөдрийг ч тайлагдаагүй нууц хэвээр байгаа.
Тэр үед Сэргээн босголт банкыг дампуурсан шалтгааныг тодруулах ажлын хэсгийг байгуулсан билээ. Уг ажлын хэсгээс гарсан дүгнэлтийг үндэслэн “Сэргээн босголт” банкыг сэргээх үүргийг УИХ-аас Засгийн газарт өгсөн байна.
“Сэргээн босголт” банкыг “сэргээж сэхээх” сонирхол тухайн үеийн томоохон албан тушаалтнуудад огт байгаагүй аж.
Эргэн төлөгдөхгүй, чанаргүй, найдваргүй зээлийг их хэмжээгээр олгож эхэлжээ. Тус банкнаас тухайн үеийн УИХ-ын гишүүний эхнэр 170 саяын зээл авч байж. Тэрбээр энэхүү мөнгөөрөө өөр нэг банкны дүрмийн санг зузаалж өөрөө тэр банкны удирдах зөвлөлийн дарга болсон байна. Энэ мэтээр тэр үеийн Ардчилсан холбоо эвслийн томчууд, УИХ-ын гишүүд 100-200 саяар зээл авч, эргэн төлөөгүй байна.Тухайлбал 1997 оны 12 дугаар сарын 31-нд Сэргээн босголт банкны захирал Ганбат 26 газрын 280,4 сая, 24 аж ахуйн нэгжийн 233,4 төгрөгийн зээлийг найдваргүйд тооцож хассан гэх. Ийнхүү жил гаруйхан хугацаанд ажилласан “Сэргээн босголт” банк 7.8 тэрбум төгрөгийн зээлийг чанаргүй зээлд бүртгэж, төлбөрийн чадваргүй гэсэн үнэлэмжид орсон байна. Үүнээс гадна “Голом”т банкны үйл ажиллагааг Засгийн газраас дэмжиж 4 тэрбум төгрөгийн бонд олгосон байна. Гэтэл төр өөрийн мэдлийн “Сэргээн босголт” банкийг дэмжиж байгаа нь энэ хэмээн 2,6 тэрбум төгрөгийн зээлийг бондоор барьцаалан хүүтэй олгосон байдаг. Ийнхүү сэргээх нэрээр дампуурсан “Сэргээн босголт” банктай холбоотой хэргийг Сүхбаатар дүүргийн шүүхээр хэлэлцэж буруутай этгээдүүдийг шийтгэсэн гэх ч өнөөдрийг хүртэл жинхэнэ дампууруулсан эзэд нь илрээгүй гэж үздэг юм билээ.
